Is jy gereed vir die kykNET Buite-ekspo Limpopo?

Die gewilde kykNET Buite-ekspo Limpopo is nou in sy negende jaar en vind vanjaar plaas vanaf 2 – 4 Augustus by die Sondela Nature Reseve & Spa, in Bela-Bela. Die oord is ook gelys as een van die top-100 oorde in Suid-Afrika.

Die geleentheid bied enige buitelewe-entoesias ’n kans om vir ’n naweek saam met familie en vriende uit te span en blootgestel te word aan die nuutste buitelewe-aanbiedings tans beskikbaar, in ’n veilige plaasatmosfeer. Die kykNET Buite-ekspo bestaan nie net uit puik buitelewe-uitstallers soos onder andere Conqueror, Loftus Caravan City, Invader, Sherpa Leisure, Pretoria Caravans, Fiamma, Infanta 4×4, Roadque, Mobi Lodge, Maxmo Campers en nog vele meer wat hul produkte op ’n baie unieke manier in die Bosveld kom uitstal nie, maar bied ook baie opwindende aktiwiteite om die hele gesin besig te hou.

Sondela is geleë net buite Bela-Bela langs die N1 (by die Bela-Bela afrit) en ongeveer 80km vanuit die noorde van Pretoria. Die oord bied akkommodasie vir kampeerders, sowel as chalets en ander akkommodasie moontlikhede. Aktiwiteite vir die adrenalien verslaafdes hierdie jaar sal weer bestaan uit gratis ritte saam met die baie gewilde Andre de Villiers van Safari 4×4 Roetes in sy VW Amarok, veldrenritte, ’n 4×4 extreme geleentheid aangebied deur Hankook asook Monstertrok-ritte in Big Mama. Daar sal ook ’n 4×4 fasiliteit wees waar uitstallers die publiek kan neem vir toetsritte.

Die kykNET Buite-ekspo Limpopo het in 2018 ongeveer 15 000 mense gelok vir ’n naweek van buitelug-avontuur en vermaak vir die hele familie. Hierdie jaar is daar ook weer ’n volwaardige tropiese slush-eiland met verskeie ander unieke aktiverings. kykNET sal natuurlik ook teenwoordig wees met die sepies waar hulle met mekaar gaan afreken by die Jimmy’s Steakhouse Sauces en Weber Sepie-Vuurgeveg om die koning van braaiers te troon. Kom kyk ook hoe lyk die Bosveld uit die lug en bederf jouself met ’n helikoptervlug teen ’n baie billike tarief. Die kinders word ook vermaak (en sommige ouers ook!) met ’n kindervermaak-area wat hierdie jaar regtig iets spesiaal gaan wees met ’n baie groot speelpark asook ’n vertoning deur Sonja en Tjokker op die verhoog en ouers kan met gemoedsrus hulleself geniet. Daar is volop gekeurde kosverskaffers op terrein met ’n groot kroeg en Castle-biertuin fasiliteit.

Ander aktiwiteite om na uit te sien – perdry ritte, veldfiets ritte in die bosveld, MTB fietsry geleenthede (Sondela het puik bestaande fasiliteite hiervoor), en ’n besoek aan die Sondela Wildlife Centre. Die splinternuwe uitleg van die kykNET Arena bied ook verskeie warmwater swembaddens wat deur al die besoekers gebruik kan word asook ’n snuffel- en kunsmark area met gekeurde uitstallers. ’n Splinternuwe GT Camper ‘Braai vir Brekvis’ aktivering gaan aangebied word wat beloof om iets uitsonderlik te wees.

Ons Hankook-verhoog spog ook hierdie jaar met verskeie puik kunstenaars soos onder andere Pieter Smith, Ruan Josh en Franja du Plessis, Willem Botha, Cheree en Jan Rhaap. Hoewel die kykNET Buite Ekspo nie ’n musiekfees is nie, maar fokus op die buitelewe produk uitstallers, glo ons tog dat daar goeie gehalte kunstenaars moet wees om die besoekers te vermaak.

Kaartjies vir die geleentheid is beskikbaar by die hekke of aanlyn by Computicket of by enige Money Market toonbank binne enige Shoprite of Checkers.

Kontak Marius Opperman vir enige navrae by 082 570 5758 of marius@ekspo.co.za. Algemene inligting sal beskikbaar wees by www.ekspo.co.za